Manarimaan ti imbestigasion dagiti awtoridad iti ipupusay ti 2-anyos ken 4-anyos nga agkabsat kalpasan a nauram ti pagtaenganda idiay Rubia, Poblacion, Sinacaban, Misamis Occidental itay kanikadua.
Iti interview ti Bombo Radyo Cagayan De Oro, kinuna ni SFO4 Anthony Rebotaso, Fire Marshal ti Bureau of Fire Protection-Sinacaban, saan a nalawag nu ti saan a nairekkep a paglutoan wenno gapu iti panagay-ayam iti lighter ti rason iti napasamak nga uram.
Dinakamatna nga awan ti kadwa dagiti agkabsat iti uneg ti pagtaenganda idi napasamak ti insidente gapu ta napan nagtrabaho ti ama ken ina dagitoy.
Mapapati nga impadlock dagiti nagannak ti balayda tapno saan a makaruar dagiti annakda nangruna ta uubbing pay dagitoy.
Gapu iti daytoy, mapapati a natrap ken saan a nakaruar dagiti dua a biktima idi maur-uram ti balayda.
Saan met a dagus a narespondean ti insidente gapu ta adayo kadagiti kakabagyanda ken naladaw a naireport kadagiti awtoridad.
Narekober ti bagi dagiti biktima a nakaarakup iti tunggal maysa nu sadino ipakpakitana a pinadas ti 4-anyos a protektaran ti kabsatna ngem dua dagitoy a pimmusay.
Kasaruno iti daytoy, nagpalagip dagiti awtoridad iti publiko nangruna dagiti nagannak a siguradoenda nga awan ti nakasaksak wenno nakalukat nga appliances ken banag a mabalin nga ayamen dagiti ubbing nu panawan ti pagtaengen ken nu mabalbalin ket saan a panawan dagiti ubbing nangruna nu babassit pay dagitoy.
