BAGUIO CITY – Nadangran ti dua nga indibidual kalpasan a natnag iti rangkis ti luganda a pick-up sadiay Alekak, Kabayan Barrio, Kabayan, Benguet idi kalman.
Nabigbig dagitoy a da George Licwasen Balancia, 36-anyos, driver ti lugan, residente ti Bambang, Nueva Vizcaya ken ni Roel Pulido Gampew, 26-anyos, residente ti Dupax Del Norte, Nueva Vizcaya.
Maibasar iti imbestigasyon ti pulisya, nagtaud dagiti biktima sadiay Ballay, Kabayan, Benguet ken agturongda sadiay Bambang, Nueva Vizcaya.
Nupay kasta, kabayatan ti panagdalyasatda iti kurba ken nakadlis a paset ti kalsada ket napukawan iti kontrol ti driver iti manibela.
Nagresulta daytoy iti panakatnag ti lugan iti rangkis nga addaan kauneg nga agarop 100 a metro.
Nagresponde met dagiti kameng ti pulisya, dagiti bombero ti Kabayan ken dagiti volunteers.
Naiturong dagiti biktima iti Kabayan Rural Health Unit para iti panakataming dagitoy.
