BAGUIO CITY – Pimmusay ti maysa a lalaki kalpasan a naidungpar ti inmanehona a motorsiklo iti nakasinnabatna a lugan iti depaar ti Tabuk-Isabela National Road sadiay Agbannawag, Tabuk City, Kalinga idi kanikadua.
Maibasar iti imbestigasion dagiti otoridad, imanmaneho ti 20-anyos a biktima ti motorsiklona ken adda ti 16-anyos a backride-na idi killaat a nag-overtake iti maysa pay a motorsiklo a kagiddana iti kalsada.
Nupay kasta, napukaw ti biktima ti kontrol iti motorsiklo isut gapuna nga inokuparna ti bangir a linya ti kalsada ken ditoy a sinabatna ti maysa a pajero.
Pinadas pay ti driver ti pajero a lisian ti motorsiklo ngem nasagid latta ti motorsiklo a nagresulta iti panakaipurwak iti kalsada dagiti dua.
Nagsagrap iti nakaro a dunor ti driver ti motorsiklo a naideklara a dead on arrival iti pagagasan bayat nga agpapaimbag ti kadwana a nagsagrap metlaeng ti dunor.
