Mapatta-patta a dumanon iti 3.5 million pesos ti danyos iti napasamak nga uram idiay MRR Queen of Peace Barangay iti Baguio City idi Sabado, Abril 13.
Iti pannakiuman ti Bombo Radyo kenni Senior Fire Officer 1 Lloyd Ashley Furigay, spokesperson ti Bureau of Fire Protection-Baguio, dimmanun iti third alarm ti nasao nga uram nu sadino, maibilbilang daytoy kas maysa kadagiti kadakkelan nga structural fire a napasamak iti siudad iti agdama a tawen.
Maibasar iti inisyal nga imbestigasyon ti nasao nga ahensya, tallo a pamilya ti naapektaran ken posible a ngumato pay daytoy apaman a malpas ti ipatungpalda a follow-up investigation.
Kabayatanna, innayon ni Furigay nga agtultuloy ti panangparegta dagitoy iti kampanyada seknan iti fire prevention ken fire safety awareness tapno masurwan dagiti residente.//Bombo Rob Dominguez
