![](https://img.bomboradyo.com/baguio/2024/02/SENIOR-CITIZEN.jpg)
Nasurok 3.7 million nga indigent senior citizen ti immawat iti P1,000 tunggal bulan a pension manipud Enero agingga Hunyo iti agdama kas maibasar iti datus ti Department of Social Welfare and Development (DSWD).
Sigun kenni DSWD Assistant Secretary and spokesperson Irene Dumlao, nangipaluspos ti ahensiya iti P21.8 billion para kadagiti 3,723,323 indigent senior citizens iti pagilian.
Ti pannakaipangato ti pension dagiti senior citizen manipud P500 iti P1,000 ket nailanad iti Republic Act No. 11916, wenno ti Act Increasing the Social Pension of Senior Citizens.
Immuna metten a nangipaluspos ti Department of Budget and Management iti P49.807 billion para iti pannakaipangato ti binulan nga allowance dagiti senior citizens.
Maipalagip a dagiti eligible beneficiaries ket masapul nga agtawen iti 60-anyos, masakit, awanan iti source of income wenno suporta manipud iti pamilyana, awan ti aw-awatenna a pension manipud iti Government Service Insurance System, Philippine Veterans Affairs Office, Social Security System, wenno pribado a kompanya.
Maibasar iti kaudian a census ti Philippine Statistics Authority, 9.22 million ti bilang dagiti senior citizen iti pagilian nu sadino uppat a milyon kadagitoy ti awanan iti government pensions, regular income sources, wenno family support.