BAGUIO CITY – Bassiten ti pangta manipud iti komunista a rebelde a grupo iti rehion Cordillera.
Impannakkel daytoy ni MGen. Laurence Mina, commander ti 5th Infantry Division ti Philipine Army iti naangay a First Quarter Meeting ti Regional Peace and Order Council.
Sigun kenkuana, pammaneknek daytoy iti kina-epektibo ti Whole of Nation Approach to End Local Communist Armed Conflict iti Cordillera.
Dinakamatna a tallo laengen a guerilla fronts ti rebelde a grupo ti mawanwanawanan iti rehion ken dagitoy ket addaan laengen ti agarup 100 a miembro.
Impannakkelna metlaeng nga awan met ti dakkel ken naranggas nga aktibidad ti nasao a grupo idi napalabas a tawen.
Kinuna ni General Mina nga umad-ado ti suporta ken naannayas a relasyon ti militar kadagiti komunidad iti rehion, pakairamanan dagiti barangay nga addaan ti impluwensia ti rebelde a grupo.
Maibasar iti rekord ti 5th Infantry Division ti Philippine Army idi napalabas a tawen, nakakompletoda ti 31 a Community Support Projects, nangipaayda ti tallo a housing assistance, nangipaayda ti akreditasyon ti asosasyon dagiti sigud a rebelde ken nangisayangkatda ti Serbisyo Caravan a nagnumaran ti nasurok 200 nga indibidual.
Impasiguradona pay nga ita a tawen ket ituloyda ti panangparmek iti nabatbati a rebelde iti rehion kagiddan ti panangipaayda ti seguridad kadagiti komunidad ken tulong iti panagdur-as dagiti nasao a lugar iti rehion.
