[photo credit to the owner]
BAGUIO CITY – Pimmusay ti tallo a tattao gapu iti dua a Vehicular Traffic Accident a napasamak sadiay Brgy. Canan, La Paz, Abra idi kalman.
Umuna a naaksidente ti maysa a motorsiklo nga inmaneho ni Myra Ogoc Balino, 33 anyos, balasang, maysa a mannursuro bayat a backrider daytoy ti kaanakanna a ni John Christian Ace Balino Figares, 16 anyos, estudiante, ken agpada dagitoy a residente ti Brgy. Bulbulala, La Paz, Abra.
Maibasar iti report ti La Paz Municipal Police Station, agturong koma ti motorsiklo sadiay Poblacion, La Paz idi na-flat ti akin-sango a pilid daytoy.
Kas resulta ket nagdiresto ti motorsiklo iti igid ti kalsada ken gapu iti kinapigsa ti impact daytoy ket natnag ti dua a biktima iti taltalon nga addaan iti distansia a dua a metro manipud iti kalsada.
Naiturong dagiti biktima iti Abra Provincial Hospital ngem kalpasanna ket naideklara dagitoy a pimmusay gapu iti kinakaro dagiti dunor a nasagrapda
Kabayatanna, natay met laeng ti maysa a lalaki kalpasan a naidungpar ti inmaneho daytoy a tricycle iti maysa na multi-cab sadiay Brgy. Canan, La Paz, Abra
Nabigbig ti biktima a ni Leocadio Leonzon Sr., 38-anyos, naasawan ken residente ti Poblacion, La Paz, Abra.
Nabigbig met ti driver ti multi-cab a ni Abraham Ocampo Batiles Jr., 45-anyos, naasawan, mannalon ken residente ti Danglas, Abra.
Sigun iti Abra Police Provincial Office, agturong koma ti multi-cab sadiay Bangued, Abra idi naidungpar daytoy iti tricycle nga agturong koma sadiay Poblacion, La Paz, Abra.
Naiturong iti ospital ti dua a driver ngem naideklara ni Leonzon Sr. a pimmusay bayat a natalged ti kasasaad ni Batiles.
Naiturong ni Batiles iti La Paz Municipal Police Station para iti pannakaipasidong daytoy iti imbestigasion.
