Naarestar dagiti tallo a lallaki kalpasan a naaktwan dagitoy a makipuspusta iti iligal a pallot(sabong) idiay Sitio Mangitit, Camp 7, Baguio City itay nabiit.
Dagiti naarestar ket pakairamanan ti agtawen ti 40, 54 ken 53 nga agpapada a residente iti Baguio City.
Naarestar dagiti nasao nga indibidwal babaen iti naipatungpal nga operasyon kontra iti illegal gambling.
Iti impormasyon a naala iti Bombo Radyo manipod kadagiti kapulisan, adda pay dagiti daduma a karaman iti nasao nga iligal nga aktibidad ngem nakataray dagitoy kalpasan ti panakakemmeg dagiti tallo.
Kagiddan dayta, nakumpiskar ti cash a dumanon iti ₱1300, maysa nga improvised cage, ken tallo a pangpallot a manok (Jolo).
Naiturong met dagiti suspek iti maseknan nga istasyon iti pulisya para iti umno a dokumentasyon bayat a manarimaan ti panakaisagana dagiti dokumento para iti panakaipila ti kaso kontra kadagitoy.//Bombo Noveh Organo
