BAGUIO CITY – Agtultuloy ti nainget a kampanya ti Baguio City Police Office ken daduma pay a yunit para iti panakatiliw dagiti indibidual a naglabsing iti linteg iti pagilian.
Kasaruno daytoy ti panakakemmeg ti 33-anyos a waiter, residente ti Bagong Barrio, Caloocan City, Metro Manila babaen iti bileg ti warrant of arrest a naiserbi kenkuana.
Sumangsango ti lalaki iti kaso a panaglabsing iti Republic Act 7610 wenno Special Protection of Children Against Abuse, Exploitation and Discrimination Act gapu iti Lascivious conduct.
Narekomendaran daytoy ti piyansa a P120,000 para iti temporaryo a panakawaya-wayana.
Kabayatanna, nailista metlaeng ti suspek kas No. 2 Top Most Wanted Person iti Baguio City Police Office ken No. 2 Most Wanted Person iti BCPO – Police Station 8.//Bombo Jez Lapizar
