LA TRINIDAD, BENGUET – Dumanon iti 345 nga atleta ti Benguet ti nakaawat ti cash incentive manipud iti opisina ni Congressman Eric Go Yap a naisayangkat idiay Department of Education-Cordillera Regional Office.
Indaolwan da Kevin See, Chief of Staff ti Benguet Congressional Office, DepEd Cordillera Director Estella Cariño ken Tublay Mayor Armando Lauro ti panangibunong dagiti insentibo dagiti atleta a nakipartisipar iti kallepas a Cordillera Administrative Region Athletic Association wenno CARAA meet a naipatungpal idiay Apayao idi napalabas a bulan ti Abril.
Naipaayan ti P2,000 dagiti atleta a nakagon-od ti gold medal, P1,200 para iti silver medal ken P1,000 met para kadagiti bronze medalist.
Malaksid iti daytoy ket naikkan ti cash incentives dagiti tunggal atleta a nagay-ayam iti team sports.
Sigun kenni Kevin See, agtultuloy suporta nga ipaay ti opisina ni Cong Yap iti programa iti sports ti probinsya babaen iti pannakapapintas dagiti pasilidad nangruna idiay Wangal Sports Complex.
Malaksid iti napapintas a gymnasium, track oval ken bleachers, manamnama ti pannakaileppas ti world class Olympic size pool facility kadagiti sumaruno a bulan.
Ginuyugoy pay ti Benguet Representative dagiti atleta ti probinsya nga ited da amin a kabaelan da iti panangibagi da iti Cordillera Region iti Palarong Pambansa a maipatungal idiay Cebu intun Hulyo 6-17 iti agdama a tawen.//Bombo Jordan Tablac
