![](https://img.bomboradyo.com/baguio/2024/05/Shooting-incident-1.jpg)
BANGUED, ABRA – Malamlamayan ita ti 38-anyos a babai kalpasan a napaltugan idiay Bangued, West Central School idiay Barangay Zone 3, Bangued, Abra.
Nabigbig ti biktima a ni Catherine Andallo Aguilar, hog raiser ken residente iti Barangay Quilliat, Langiden, Abra.
Sigun iti Abra Police Provincial Office, agtugtugaw ti biktima iti motorsiklona iti sango ti nasao a pagadalan idi dinumteng dagiti dua a suspek a lalaki a nakalugan iti nangisit ken nalabbaga a motorsiklo ken pinaltuganda ti ulo ti biktima iti namindua a daras.
Iti inisyal nga imbestigasyon ti pulisya, rumrumwar nga ur-urayen ti biktima ti karelasyonna ken ti sundoenna nga ubing idi napasamak ti krimen.
Naitaray ti biktima iti ospital ngem naideklara a dead on arrival.
Dagus met a nangisayangkat dagiti otoridad ti hot pursuit operation a nangitunda iti pannakatiliw dagiti dua a suspek.
Nabigbig ti gunman a ni Joemar Britanico Bayle, 40-anyos bayat a ti driver ket ni Dennis Viado Britanico, 21-anyos, agpada a residente ti Langiden, Abra.
Naipaima metten dagiti suspek kadagiti otoridad para iti pannakaipila ti kaskenan a kaso.