BAGUIO CITY – Nakumpiskar sadiay Poblacion, San Isidro, Abra ti 40 a kilo ti baboy a nagtaud sadiay Pangasinan.
Maibasar iti report, nailugan iti maysa a van dagiti nasao a karne ti baboy ken maiturong kuma sadiay munisipyo ti Pilar.
Naamuan a nakaawat iti report ti San Isidro Municipal Agriculture Office seknan iti kaadda ti karne ti baboy iti uneg ti nasao a van.
Dagus met a naisayangkat ti panaginspeksion iti nasao a van iti tulong dagiti personnel ti San Isidro Municipal Police Station.
Gapu iti daytoy, mamulta iti P15,000 ti agtagikua kadagiti karne ti baboy gapu iti panaglabsingna iti Provincial Ordinance 316, series of 2020 wenno ti ASF Prevention Ordinance of Abra.
Nailanad itii ordinansa a maiparit ti panangiserrek sadiay Abra iti karne ti baboy ken aniaman a produkto ti baboy nga agtaud iti ruar ti probinsia.
