BOMBO NEWS ANALYSIS- Panawen manen tapno maisakad ti panakaipangato ti sueldo dagiti mangmangged.
Daytoy ket gapu iti agtultuloy a panagngato ti presyo dagiti serbisyo ken gagatangen.
Iti kinpudnona, saan nga umdas ti 430 pesos a minimum wage iti rehiyon ti Cordillera.
Adayo daytoy no idilig iti family living wage nga P1,207.
Iti kinapudnona, uray naaprobaran ti tallopulo ket lima a pisos a kanayunan a sueldo sadiay metro manila , kurang latta ti 645 pesos tunggal aldaw a minimum wage sadiay.
Ad-adda pay nga saan nga umanay ti 430 pesos a minimum wage iti cordillera.
Nupay kaipatpatungpal idi disyembre idi napan a tawen ti kanayunan a sueldo, nabatad latta ti basaran a rumbeng a maipangato manen ti sueldo.
Gapu iti daytoy, rumbeng a repasuen manen ti regional tripartite wages and productivity board ti posibilidad a maipatungpal manen ti kanayunan a sueldo kadagiti mangmangged iti pribado a sektor.
nupay rumbeng a maikonsidera dagiti babassit a negosyante, rumbeng a masukimat ti financial record dagiti dadakkel a kompanya a pagbasaran iti umno a panakaipangato ti sueldo.
Saan a rumbeng a mapatpati lattan ti gobyerno iti ipetpetteng dagiti dadakkel a kompanya a saanda a kabaelan a mangipaay iti kanayunan a sueldo.//Bombo Alfred Pudsoc
