BAGUIO CITY – Nakailista ti Department of Labor and Employment Cordillera iti uppat a pulo ket lima nga indibidual a dagus a naawat iti trabaho wenno hired on the spot (HOTS) iti naangay a Kalayaan Job Fair ita nga aldaw iti kadakkelan a mall iti siyudad ti Baguio.
Iti panakiuman ti Bombo Radyo kenni DOLE-CAR Assistant Regional Director Atty. Olivia Obrero-Samson, kinunana nga iti tallopulo a minuto a panangrugi ti nasao nga aktibidad ket addan ti pito a dagus a naala iti panagaplikarda iti trabaho.
Kinunana a kaaduan a nahire ket dagiti agbalin a personnel dagiti sumagmamano a kompanya kas iti Valley Bread, Foam Coffee, SM Supermart, ken Miniso.
Innayonna a dumanon iti 227 a registered job seekers ti nakipartisipar iti impatungpal ti nasao nga ahensya ita nga Independence Day.
Mainaig iti dayta, imbinglayna nga agarup 1K a job vacancies ti naidiaya para kadagiti job seekers nu sadino dumanon iti 22 nga employers ti nakipartisipar.
Imbinglay ni Atty. Samson a dagiti nasao nga employers ket nakipartisipar metlaeng iti kaudian a job fair nga indauluan ti DOLE idi May 1 nu sadino dagiti nasao nga employers ti addaan iti kangatuan a bilang ti na-hire on the spot a job seekers.
Kabayatanna, inyebkas met ni Fritz Liw-an ti kinaragsak daytoy kalpasan a na hire on the spot isuna kas cashier iti maysa a coffee shop.
Imbinglay ni Liw-an a nangipatungpal pay daytoy umuna iti “background check” iti kita ti business a pag-aplikaranna ken ti klase ti trabaho nga aplikaranna.
Kasta pay, dakkel met ti panagyaman daytoy agsipudta addaan daytoy iti connection iti employerna nu sadino agpadada a pag-aayatda ti kape.
Imbinglayna a maysa daytoy a graduating student ken kinunana a saaannan a rumbeng nga urayen a makagraduar daytoy sakbay nga agbiruk iti pagtrabahuanna ngamin adda posibilidadna nga adu ti ka kompetensiyana iti kanito nga ag apply daytoy iti trabaho kalpasan ti graduation.//Bombo Genzel Depayso
