Naarestar ti maysa a 49-anyos a babae iti maysa a buy-bust operation nga impatungpal ti Baguio City Drug Enforcement Unit, Baguio City Police Station 9 ken City Intelligence Unit idiay Irisan, Baguio City idi rabii.
Ti suspek ket residente metlaeng iti nasao a lugar.
Nakumpiskar manipud iti suspek ti ilakona kuma a maysa a plastic sachet a naglaon iti maatap a shabu nga agdagsen iti agarop maysa a gramo ken addaan iti Standard Drug Price a PhP6,800.
Nakumpiskar metlaeng manipod kenkuana ti maysa a plastic sachet a naglaon ti maatap a shabu nga agdagsen ti agarop 0.5 a gramo nga addaan met ti standard drug price a PhP3,400 ken sabali pay a sachet ti maatap metlaeng a shabu nga agdagsen ti 2.5 a gramo nga addaan iti Standard Drug Price nga PhP17,000.
Naala metlaeng manipud iti suspek dagiti non-drug evidences kas iti maysa a lima gasut a kwarta ken pito a lima gasut a boodle money, maysa a selpon, ken maysa a puraw a papel.//Bombo Jerwin Aquino
