![](https://img.bomboradyo.com/baguio/2020/04/eric-yap-bagas.jpg)
BAGUIO CITY – Maiwarasen kadagiti munisipyo ti Benguet ti kanayonan a tulong nga impatulod ni ACT-CIS Representative ken Benguet Caretaker Congressman Eric Go Yap para kadagiti umili ti probinsia.
Sigun kenni Kevin See, Chief of Staff iti Benguet Congressional District-Office, dumanon iti 500 a sako ti sag-50 a kilos ti maiwaras kadagiti 13 a munisipyo ti Benguet.
Dinakamatna a personal a kwarta ti kongresista ti inaramat daytoy a nanggatang kadagiti nasao a bagas.
Innayonna nga ikagumaan ni Congressman Yap ti agbiruk iti dadduma pay a pagalaanna iti bagas a maiwaras iti probinsia gaputa maysa ti Benguet ken dagiti umili daytoy kadagiti prayoridad ita ti mammanday-linteg.
Maipalagip a nangidonar ni Yap iti maysa a milyon a pisos para iti provincial government ken iti pagkasapulan ti Benguet General Hospital iti kampanya kontra iti COVID-19.
Malaksid iti daytoy, gimmatang ni Congressman Yap iti walo a tonelada ti highland vegetables manipud kadagiti mannalon ti Benguet a maiwaras met kadagiti nagduduma nga apektado a lugar sadiay Manila gapu iti enhanced community quarantine.
Innayon ni See a linawas ti panaggatangda iti nateng manipud iti Benguet tapnu matulongan dagiti mannalon nga apektado iti agdama nga epekto ti COVID-19 pandemic.