BAGUIO CITY – Kinumpirmar ti lokal a gobierno ti Itogon, Benguet a nakastreken iti munisipio ti African Swine Fever (ASF).
Iti interbyu ti Bombo Radyo ken ni Mayor Victorio Palangdan, kinunana gapu iti panagpositibo ti munisipio ket naipasidong iti culling wenno naigagara a napapatay ti 57 a baboy sadiay.
Kinunana a nagpositibo iti ASF dagiti taraken a baboy a nigerian breed sadiay Labilab, Loacan, Itogon ken dagitoy ket nagtaud sadiay La Union a nagatang babaen iti online.
Dinakamatna a nairaman a naapektaran iti ASF ti dadduma a taraken a baboy iti kaaruba ti nagtaudan ti virus.
Iti baet daytoy, kinuna ti opisial a saan a naipasidong iti lockdown ti munisipio gapu ta dagus a naaksionan ti parikot.
Kinunana a masapul a sertipikado ti veterinarian dagiti amin a maiserrek ken maiuruar a karne ken sibibiag a baboy sadiay Itogon, Benguet.
