BAGUIO CITY – Naiwarasen dagiti 600 a family food packs kadagiti agkasapulan unay a residente ti Irisan Barangay, Baguio City gapu iti epekto ti COVID-19.
iti panakiyuman ti Bombo Radyo Baguio kenni Irisan Punong Barangay Arthur Carlos, kinunana a nakaawat ti barangayda iti 600 a pidaso ti family food packs manipud iti City Social Welfare and Development Office idi kalman.
Linawlawaganna met a dagiti naipaayan ken pakaipaayan dagiti 600 a family packs ket kadagiti nailista a priorities wenno dagiti nakaro a naapektaran.
Dinakamatna a nadutukan dagiti purok leaders a mangala ken mangilista iti nagan dagiti umili iti masakupanda a purok nga apektado unay iti epekto ti COVID-19.
Innayonna a naisumitir ti nasao a listaan iti lokal a gobyerno ken dagitoy ti nakailatangan dagiti nasao a tulong.
Sigun pay iti kapitan, maituloy ti profiling tapnu mainayon metten amin dagiti dadduma a residente ti Irisabn a saan a naipangruna iti immuna a listaan.
Kabayatanna, impetteng ni Kapitan Carlos nga awan ti panagpili ken awan dagiti kabagyan dagiti opisyal ti barangay a naiyun-una wenno naipangruna a nailista iti nasao a listaan.
Impettengna pay a ti panakaipangruna dagiti agkasapulan unay ket maysa a pammilin kadakuada.
Gapu iti daytoy, inyapelana ti panakitinnulong, panakikaykaysa, panaka-awat ken panagtulnog dagiti umili kadagiti pagalagadan ken paglintegan a maipatpatungpal kagiddan ti manarimaan nga Enhanced Community Quarantine tapnu saanen a maiwaras pay ti mapagbutbungan a COVID-19.
