BAGUIO CITY – Bimmaba ti kaso ti panangrames iti siyudad ti Baguio idi napalabas a dua a tawen.
Sigun kenni PCapt. Angeline Dongpaen, pannakangiwat ti Baguio City Police Office, nailista ti 44 a kaso ti panagrames idi tawen dos mil bente dos, bimmaba daytoy iti 36 a kaso idi napalabas a tawen, bayat a lima laeng iti umuna a quarter ita a tawen.
Ti kangrunaan met a makagapu ti nasao a kaso ket gapu iti epekto ti arak.
Nupay kasta, kaaddoan ka kadagiti kaso ket nasolbar gapu ta nabigbig dagiti suspek babaen iti tulong dagiti biktima a dagus a nangireport iti napasamak kadakuada.
Impasigurado met ni PCapt. Dongpaen nga agtultuloy ti panagregget dagitoy babaen iti tulong ti Women and Children Desk kadagiti tunggal barangay tapno agtalinaed ti nababa a kaso ti panagrames.
Kabayatanna, sumagmamano kadagiti ar-aramidenda nga addang ket Information dissemination iti Anti-rape law, ken Violence Against Women and their Children (VAWC) ken dadduma pay.
Impanamnamana pay nga agtultuloy ti suporta nga ipaayda kadagiti biktima ken saanda nga agsardeng tapno magun-od dagitoy ti hustisya.//Bombo Jez Lapizar