BAGUIO CITY – Malaglagip ita nga aldaw ti nakalkaldaang ken nakaam-ames a pasamak iti paka-istoryaan ti pagilian nangruna iti siudad ti Baguio a nangsango iti 1990 killer earthquake.
Iti panakiuman ti Bombo Radyo kenni Art Tibaldo, Veteran Journalist, ti nasao a pasamak ket nakaro unay gapu ta arigna nga inrikosna ti lubong.
“Dayta nga pasamak ket talaga nga sobra, haan laeng nga inwasiwas, insaltek, inwagwagโฆkasla nga inrikosna ti lubong.”
Art Tibaldo, Veteran Journalist
Adu pay kadagitoy ti nangipagarop a gibusen ti lubong iti nasao a kanito gapu ta saan nga ordinaryo ti napasamak a ginggined.
Sigun kenkuana, nalipatanna ti akemna kas maysa a newsman gapu ta immunan a pinanunotna ti pamilya ken ti kasasaad ti masikog nga asawana iti nasao a panawen.
Innayona nga idi napasamak ti nasao a didigra ket naawan ti suplay ti kuryente rason a naputed ti means of communication dagitoy.
Maysa laeng kadagiti wagas ti komunikasyon dagitoy ket ti single-sideband radio ngem agdalan pay daytoy iti nagduduma a channel sakbay a sumangpet ti impormasyon idiay Manila.
Kinunana a ti Burnham park ken Rizal park ti nagbalin a tent city gapu ta isu ti nagturongan ken nagtalinaedan dagiti tattao.
Sigun kenni Tibaldo, saan a malipatan dagiti pimmusay, dagiti naitaray kadagiti ospital, dagiti sangit ken dagiti tattao nga arigna a ‘zombie’ a magmagna iti Session road gapu ta awan ti turongenda.
Maysa pay kadagiti nakaskas-ang a pasamak ket adu ti napukawan ti biag, sanikua, ken panagdanag kadagiti kasasaad dagiti kakabagyanda.
Ita nga aldaw ti maika-tallo pulo ket uppat a tawen sipud napasamak ken narikna ti makapapatay a didigra iti siudad ti Baguio.
