BAGUIO CITY – Imbinglay ni Philippine Military Academy (PMA) Commandant of Cadets Brigadier General Romeo Brawner Jr. a nakitana ti panagbabawi kadagiti pito a kadete a suspek iti panakamaltrato daydi Cadet 4th Class Darwin Dormitorio.
Sigun kenkuana, sinarungkaranna dagiti nasao a kadete nga idadauluan ni Cadet 1st Class Axl Rey Sanopao.
Kinunana a nakitana ti liday iti mata dagiti nasao a kadete ken ti panagbabawi dagitoy gaputa saan met a kinayat dagitoy nga adda ti matay.
Innayonna a saan nga intension dagiti pito a kadete nga adda ti papatayenda ngem saan a naliklikan ti napasamak isut gapuna nga agbabbabawi dagitoy.
Maipalagip nga ita ket adda paylaeng iti stockade ken iti holding center ti akademya dagiti pito a kadete a sumangsango ita iti kaso nga administratibo ken kriminal gapu iti ipupusay ni Cadet Dormitorio.
Dinakamat pay ni Brigadier General Brawner nga adda ti general court marshal a mabukel para iti panakatingiting ti administrative case dagiti pito a sumangon to iti kaso a panaglabsing iti Articles of War 96 wenno iti conduct unbecoming of an officer and a gentleman.
Innayonna a gapu iti kadagsen ti kaso dagiti pito ket nasken nga adda ti mabukel a general court martial ken ita ket mapilpilin dagiti mangbukel iti nasao a military court.
Maipalagip a malaksid kenni Sanopao ket suspek metlaeng iti panagmaltrato iti daydi Cadet Dormitorio da Cadet 3rd Class Shalimar Imperial, Cadet 3rd Class Felix Lumbag Jr., Cadet 3rd Class John Vincent Manalo, Cadet 3rd Class Julius Carlo Tadena, Cadet 3rd Class Rey David John Volante ken ni Cadet 2nd Class Christian Zacarias.
