BAGUIO CITY – Nakaawat iti nasurok P1-M a gatad ti tulong ken benipisyo manipud iti gobyerno dagiti 70 a sigud a kameng ti rebelde a New People’s Army (NPA) ken Militia ng Bayan.
Inawat dagiti benipisaryo ti insentibo dagitoy iti naangay a mass awarding ti assistance manipud iti Enhanced-Comprehensive Local Integration Program (E-CLIP) ken provincial grants para kadagitoy.
Tallo kadagiti sigud a rebelde nga NPA ti nakaawat ti sag-P65,000 kas immediate cash ken livelihood assistance bayat a dagiti sigud a Militia ng Bayan ket nakaawatda ti sag-15,000.
Naipaay pay ti P45,000 agingga P100,000 para kadagiti naisuko nga igam iti sidong ti firearm remuneration.
Pinagyamanan met ti gobernador ti Ifugao ti panagsuko dagiti nasao a sigud a rebelde para iti nataltalna a panagbiag dagitoy iti komunidad, kadwada ti pamilya dagitoy.
