Dumanon iti 728 a kameng iti pulisya ti maideploy kadagiti nagduduma a polling precincts iti probinsya ti Benguet inton Lunes, aldaw para iti 2025 Midterm Elections.
Sigun kenni Police Colonel Joseph Bayongasan, Provincial Director iti Benguet Police Provincial Office, sumagmamano a kapulisan iti Benguet ti nai-augment iti probinsya iti Abra nga agserbi a katulungan dagiti personnel nga agbantay sadiay.
Nupay naksayan ti bilang dagiti personnel iti Benguet, impanamnaman ni PCol. Bayongasan nga awan ti masapol a pagdanagan dagiti umili iti nasao a probinsya gapu ta amin a polling precincts ket mabantayan.
Malaksid iti dayta,generally peaceful ken Green Category ti nakairamanan dagiti sangapulo ket tallo a munsipyo iti Benguet, kaawatan nga awan iti problema.
Kabayatanna, imbinglay met ni Police Colenel Ruel D. Tagel, ti City Director iti Baguio City Police Office a kas iti probinsya iti Benguet, generally peaceful ken green category metlaeng ti City of Pines.
Impeksana a kumpiyansa dagitoy nga agbalin a natalna ti election iti siudad gapu ta malaksid iti deployment dagiti personnel ti Baguio City Police Office kadagiti polling precincts,nag-augment metlaeng dagitoy kadagiti pwersada iti probinsya iti Abra.
Gapu iti nasayaat a panakikoordinarda kadagiti line agencies kas iti Commission on Elections, Department of Public Works and Highways, ken iti Department of Education, maipanamnamada ti naannayas a pannakaipatungpal ti 2025 National and Local Elections.//Bombo Genzel Depayso
