BAGUIO CITY – Nanayonan pay ti bilang dagiti Cordillerans a nabakunaan kontra iti COVID-19 kagiddan ti panang-artap ti rehion iti puntirya ti national government a panakabakuna ti 70% iti popolasyon ti tunggal lugar sakbay ti panaggibus ti 2021.
Maibasar iti datus ti Cordillera Regional Vaccination Operations Center idi Martes, December 28, 2021 , pakabuklan a nasurok 1.9 million a doses ti nagduduma a bakuna kontra iti COVID-19 ti naipaay kadagiti dose-anyos nga agpangato a popolasyon ti rehion Cordillera.
Manipud iti nasao a bilang, nasurok iti 943,000 dagiti naka-awat ti first dose bayat a nasuroken iti 989,000 dagiti naan-anay wenno nakakompleto ti bakuna malaksid pay kadagiti nasurok 42,400 a nakaawat ti booster shot.
Iti agdama, manipud iti nasurok 1.27 million nga umili ti Cordillera a puntirya a mabakunaan kontra iti COVID-19 ket 73.60% kadagitoy ti fully vaccinated bayat nga 83.63% ti partially vaccinated.
Kabayatanna, nasuroken iti 93,000 ti pakabuklan a kaso ti Cordillera iti COVID-19 a bukbuklen ti 2,268 a pimmusau; agarup 90,800 a naimbagan ken nasurok 90 nga aktibo a kaso ti coronavirus.
