BAGUIO CITY – Akomodaren latta ti COMELEC-Baguio dagiti agturong iti opisinada tapnu agparehistro wenno saan ket ag-reactivate ti rekord para iti masungad nga eleksion.
Iti panakiuman ti Bombo Radyo Baguio kenni City Election Officer Atty. John Paul Martin, kinunana a babaen iti daytoy ket maragpatda ti puntiryada a 10,000 nga indibidual a maiparehistro iti agdama a voter’s registration sakbay nga agpaso inton Setyembre 30.
Dinakamatna nga iti siudad ti Baguio ket adu pay dagiti ‘deactivated’ a botante a saan pay a nagpa-reactivate ti rekord isut gapuna nga agtultuloy ti panangikampanyada iti panagparehistro dagitoy.
Innayonna a dumanon laeng iti 2,000 dagiti nagparehistroda idi napalabas a bulan ti Hulyo isut gapuna a puntiryada a maiparehistro ita a bulan ti Agosto agingga inton sumaruno a bulan ti Setyembre ti nabatbati nga 8,000.
Nupay kasta, impasiguradona a kalpasan ti alas-siete ti rabii inton September 30 ket saanen daytoy nga agakomodar kadagiti kumamakam nga agparehistro gaputa nawadwad ti naipaay a panawen kadagitoy tapnu agturong ken agparehistro iti COMELEC-Baguio.
Kabayatanna, dinakamat ni Atty. Martin a maituloy latta ti satellite registration ken ad-adalenda ti panakailatang ti aldaw ti Sabado kas eksklusibo nga aldaw para kadagiti vulnerable sectors, partikular dagiti senior citizens ken dagiti persons with disabilities wenno PWDs.
Innayonna a mabalin a rugianda ti nasao a sistema inton sumaruno a lawas.
Makikokoordinar metten daytoy iti dadaulo dagiti PWDs iti siudad ken iti grupo dagiti senior citizens iti Salud Mitra Barangay tapnu maallukoyna dagiti saan pay a nagparehistro nga agnumar iti isayangkatda a satellite registration para kadagitoy.
