BAGUIO CITY- Dumanon iti siyam nga establishemento wennu botika ditoy Baguio City ti naipaayan iti pammalubos manipud iti Food and Drug Administration(FDA-Cordillera) tapnu aglako iti self antigen test kits .
Sigun ken Licensing Officer FDA-Cordillera Saturnina Pandosen, nanayunan iti pito ti dua nga immunan a naipaayan iti pammalubos kalpasan a nangiproseso dagitoy iti kaskenan a dokumento ken papeles a kiniddaw dagiti maseknan nga ahensya.
Kinunana a manamnama pay a manayunan daytoy agsipodta manarimaan iti registration dagiti daduma pay a botika.
Inyunay-unayna a dagiti laeng naberipikar ken nasertipikaran iti FDA dagiti palubusanda nga aglako tapnu maipasigurado a natalged daytoy nga aramaten ti publiko.
Malaksid iti dayta, kinunana a maysa nga iwanwanawan dagitoy ita ti presyo dagiti test kits tapnu awan ti mailista nga overpricing.
Dinakamatna a dumanon laeng iti P280 agingga P300 ti presyo ti maysa nga test kits.
Kagiddan iti dayta, maragsakan daytoy gaputa awan pay dagiti naawatda a report wennu reklamo manipud kadagiti umili seknan kadagiti agilaklako iti peke nga self antigen test kits ditoy lokalidad.
Nupay kasta, kidkidawenna ti dagus a panangireport dagiti umili nu adda man dagiti maimatanganda a mangilako kadagiti peke/bogus nga test kits tapnu dagusda nga sukimaten.
Maipalagip a naiyuswat ti pilot testing iti self antigen test Kits ditoy siudad kadagiti sumagmamano a distrito tapnu nalaklaka a magatang ken nalaklaka met a mabigbig dagiti posible nga nakaptan iti virus
