BAGUIO CITY – Namnamaen ti Department of Labor and Employment (DOLE) – Cordillera nga ad-adu pay nga OFWs ti agawid ditoy rehion kagiddan ti agtultuloy a mapaspasaran a pandemya gapu iti COVID-19.
Iti interview ti Bombo Radyo Baguio kenni DOLE-Cordillera Regional Director Exequiel Ronie Guzman, dinakamatna a pakabuklanen a 950 a returning OFWs ti nakaawid iti nagduduma a paset ti rehion.
Sigun kenkuana, 594 dagiti land-based OFWs a kaaduanna ket nagtaud sadiay Middle East ken iti Asya bayat a 356 dagiti sea-based a kaaduanna ket nagtaud sadiay Europe ken iti Americas.
Iti baet daytoy, impasiguradona a nakasagana latta ti DOLE-Cordillera a mangipaay iti tulong a pagkasapulan dagitoy agingga a makaawidda kas iti libre a transportasyon manipud Manila agingga iti pagtaengan dagitoy.
Ibakbalay metlaeng ti ahensia dagiti temporary shelter ken libre nga akomodasyon dagiti OFWs no kasapulan a maipasidong dagitoy iti medical check-up malaksid pay kadagiti food packs.
Innayon ni Guzman nga adda metlaeng ti P10,000 a naipaay kadagiti kwalipikado nga OFWs iti sidong ti DOLE-Abot Kamay ang Pagtulong (AKAP) Program.
Sigun pay kenkuana, no adda dagiti agaw-awid ditoy pagilian gapu iti panaka-apektarda iti agdama a pandemya ket adda met latta dagiti rumrumwar iti pagilian tapnu agtrabaho kadagiti pagilian kas iti Cambodia, Vietnam ken Singapore nga awanan unay ti kaso ti COVID-19.
