BAGUIO CITY – Dumanonen iti 99% kadagiti personnel ti Baguio City Police Office (BCPO) ti nabakunaan kontra iti COVID-19.
Imbinglay daytoy ni PCol. Glenn Lonogan, dadaulo ti BCPO iti panakiuman ti Bombo Radyo Baguio.
Sigun kenkuana, 19 laengen a pulis iti siudad ti saan pay a nabakunaan ngem dagitoy ket masikog ken addaan ti an-anayen isut gapuna a saanda pay a naipaayan ti pammalubos nga agpabakuna.
Dinakamatna nga iti agdama ket tallo ti aktibo a kaso ti COVID-19 kadagiti personnel ti BCPO nupay dagitoy ket fully vaccinated.
Inlawlawagna met a dagitoy ket naka-deploy kas vaccinators ken contact tracers isut gapuna a kanayon ti panaka-expose dagitoy kadagiti tattao.
Sigun pay kenni Col. Lonogan, epektibo ti panagpabakuna kontra iti COVID-19 gaputa manipud kadagiti 214 a personnel ti BCPO a naipasidong iti kaudian a mass testing iti siudad ket dua laeng kadagitoy ti nagpositibo.
Gapu iti daytoy, kanayonda nga ibalbalakad ti panagpabakuna kontra iti coronavirus gaputa daytoy ti proteksion kontra iti nasao a sakit.
