BAGUIO CITY – Naituloy dagiti filming activities ditoy siudad ti Baguio.
Sigun kenni Atty. Althea Alberto, Executive Assistant ti City Mayor’s Office, naipalubos ti panakaituloy ti nasao nga aktibidad kalpasan a nabukel ti istrikto wenno nainget a pagalagadan para iti panakaisayangkat ti nasao nga aktibidad ditoy siudad ti Baguio.
Maipalagip a naipasardeng ti amin a shooting activities ditoy siudad kalpasan a nagpositibo iti COVID-19 ni Arjo Atayde ken dadduma a kakadwa daytoy ken ti panaglabsing dagitoy kadagiti pagalagadan ti siudad kontra iti nasao a sakit.
Dinakamatna nga iti agdama ket adda ti uppat a filming activities ditoy siudad para iti television series ken dua a pelikula.
Impasiguradona met nga addaan iti kaskenan a dokumento ken nakompleto ti bakuna kontra iti COVID-19 dagiti karaman kadagiti nasao a filming activities.
Inlawlawagna a nagbalinda nga istrikto kadagiti pagalagadan iti panakaipalubos iti film shooting ditoy siudad kas iti nainget a panakasurot ti bubble setting a rason tapnu saan a mabalin nga umuneg ken rumwar iti siudad dagiti karaman iti nasao nga aktibidad.
Dinakamatna a nasken a maipaima kadakuada ti listaan dagiti amin a karaman iti filming kas kaqdagiti artists ken staff tapnu maipasidong amin dagitoy iti triage ken maliklikan nga adda dagiti travelers nga agpammarang a kadwa dagitoy tapnu makalusot iti borders ti siudad.
Maikalkalikagum met ti panakadutok ti safety protocol officer ti grupo a mangisayangkat ti filming tapnu daytoy ti makikoordinar iti district health center ti barangay a makaipatungpalan ti film shooting dagitoy.
Impasiguradona met iti nainget a panakaiwanawan dagiti maseknan a grupo kadagiti accomodation establishment a nagdagusan dagitoy.
