BAGUIO CITY – Pagdandanagan ita ti City Health Services Office (CHSO) ti Baguio ti panagtalinaed a nangato ti kaso ti human immunodeficiency virus (HIV) infection ditoy siudad.
Daytoy ket iti baet ti nainget a panakaipatungpal ti minimum public health standards kagiddan ti agdama a COVID-19 pandemic.
Sigun kenni Assistant City Health Officer Dr. Celia Flor Brillantes, dumanonen iti 110 ti nairekord dagitoy a kaso ti HIV infection iti siudad manipod nangrugi ti panangimplementarda iti HIV surveillance idi 2017.
Dinakamatna a manipod nangrugi ti pandemya, nakailistada ti 40 a kaso ti HIV infection ken kaaduan dagitoy dagiti lallaki a nakinaig iti padada a lallaki.
Iti baet ti daytoy, kinunana nga agtultuloy ti panangipatungpal ti CHSO iti information and education campaign kadagiti puntiryada a sektor ti komunidad para iti umno a panakaipakaamo dagiti programa, proyekto ken aktibidad ti lokal a gobierno ti Baguio mainaig iti nasao a sakit.
