BAGUIO CITY- Isingsingasing ti Alliance of Concerned Teachers Cordillera iti baro a dadaulo ti Department of Education ti pannakaadal manen ti K to 12 program.
Iti panakiuman ti Bombo Radyo Baguio, kinuna ni Jeanette Cawiding, dadaulo ti nasao a grupo, saanna a kayat a saoen a nu ad-ado ti tawen a busbosen ti maysa nga estudyante iti panagadal ket ad-ado met ti maadal daytoy.
Dinakamatna a maysa ti Pilipinas kadagiti mabigbigbig a pagilian kas “best in English Speaking” ngem kaudian met nu maipapan iti panagdur-as ti ekonomiya.
Impettengna a gapu daytoy iti work demand ken nangato a sweldo iti daduma a pagilian rason a pilien dagiti kakailyan nga agtrabaho iti ballasiw-taaw.
Gapu iti daytoy, kidkiddawen ti grupo ti pannakaadal manen ti nasao a programa ken ti panakaipangruna dagiti programa a makatulong kadagiti estudyante.
Impaganetget ni Cawiding nga ado metten ti nagturpos nga estudyante a nangbabbalaw iti K to 12 program gaputa saan unay a nakatulong iti learning development dagitoy.
Immuna metten nga inwaragawag ni Vice President-elect ken incoming education chief Sara Duterte nga adalenna ti implementasyon ti K to 12 program partikular ti epekto daytoy kadagiti estudyante.
