BAGUIO CITY – Pimmusay ti maysa a lalaki kalpasan nga aksidente a pinaltoganna ti kadwana sadiay Mt Alibut-tung, Bokiawan, Kiangan, Ifugao itay nabiit.
Nabigbig daytoy a ni Fredie Ananayo Yogyog, 43-anyos, mannalon ken residente ti Sitio Ampugpug, Bokiawan, Kiangan, Ifugao
Nabigbig met ti suspek a ni Lener Layagon Tobiagon, 28-anyos, mannalon ken residente metlaeng iti nasao a lugar.
Maibasar iti inisyal nga imbestigasyon, napan nag-anop ti suspek ken ti biktima sadiay Mt Alibut-ung idi Setyembre 4, alas dies ti agsapa.
Nagdesisyon dagitoy nga agawid idi Setyembre 5, alas dies ti agsapa, ngem adda ti nakitada a baddek ti ugsa rason a nagsinada iti pagnaan tapno anupenda daytoy.
Kabayatan ti panag-anop, adda ti nakita ti suspek nga aggar garaw iti kasamekan a disso (bushy area).
Impagarupna nga ugsa daytoy rason a pinaltuganna.
Nupay kasta, nadiskobrena a ti pinaltoganna ket ti kadwana gayam.
Dagus a nagawid ti suspek ken inreportna ti insidente rason a naiyawid ti bangkay ti biktima.
Addan ti suspek iti kustodiya ti Kiangan MPS.
