Nangipila ti maysa nga umili idiay Abra ti pormal a reklamo kontra iti umuna a nominee ti maysa a party-list seknan iti mapapati a vote-buying bayat ti maysa a programa ti Department of Education (DepEd) idi Pebrero.
Naawat ti Commission on Elections ti reklamo nga indatag ni Herminio Zapata kontra iti Solid North party-list 1st nominee Menchie Bernos ken maysa nga opisial ti Department of Education (DepEd) ti Abra idi Marso 7, 2025.
Iti walo a panid ti reklamo, inakusaran ni Zapata ni Bernos iti panaglabsing ti Sections 261(a) (1) (b) ti Omnibus Election Code bayat ti attendance-na iti DepEd Education Summit idiay Abra idi Pebrero a kinse.
Sigun iti nagreklamo, iti baet a saan nga opisial ti Department of Education ni Bernos, naimatangan ni Bernos iti entablado kaduana dagiti opisial ken dadduma pay nga education personnel.
Mapapati a naimatangan pay dagiti tarpaulins ti nasao a party-list iti nasao a lugar.
Kinunana ni Zapata a mapapati a nakaawat dagiti timmabuno kadagiti tumblers a naglaon iti P3,000 a kuarta ken addaan logo ken official ballot number ti party-list bayat ti nasao nga aktibidad.
Iti agdama, awan pay ti komento ni Bernos seknan iti nasao nga alegasion.
