Impeksa ni Senador Ronald “Bato” Dela Rosa ti kinapositibona a patas ti pangngeddeng ti Korte Suprema iti petision a mangikagkagumaan a mangiparit kadagiti ahensia ti gobierno a makitinnulong iti International Criminal Court ken ti imbestigasion seknan iti war on drugs ni Duterte.
Iti press statement idi kalman, kiniddaw ni Dela Rosa iti Korte Suprema nga agdesision maibasar iti “merit” ti petision.
Ni Dela Rosa ken sigud a President Rodrigo Duterte, babaen ti abogadoda a ni Atty. Israelito Torreon ket nangipila ti petision a certiorari kontra kenni Executive Secretary Lucas Bersamin, Justice Secretary Jesus Crispin Remulla, ken dadduma pay opisial seknan ti nagbalin nga addang ti administrasion ni Marcos seknan ti kaso iti ICC.
Ti petision ket mangkidkiddaw iti temporary restraining order tapno malapdan ti pannakakemmeg ni Duterte, ngem daytoy ket inlibak ti Korte Suprema.
Kas sungbat, nangipila ti legal team da Duterte ken Dela Rosa iti motion for reconsideration, a mangidagadagdag iti nangato a korte ti ad-adu pay nga addang tapno masigurado ti panagsubli ni Duterte ditoy Pilipinas.
