Mapadpadaanan ti maysa kadagiti major highlight ti Strawberry Festival sadiay La Trinidad, Benguet a panakaiparangan ti giant “Kayabang” strawberry shortcake inton Marso baente tres iti agdama a tawen.
Ti giant Kayabang strawberry shortcake ket mangaramat iti lima gasut a kilo ti strawberries ken naituding a ti katayag daytoy ket 10 feet, kalawa a 7 feet ken ti height ti base daytoy ket 2 feet.
Mapatta-patta a dumanon iti 16-K nga slices ti mapataud iti nasao a giant Kayabang cake.
Ti giant Kayabang cake ket maishape kas iti traditional basket iti rehiyon Cordillera a paga-ammo kas kayabang no sadino daytoy ket kadawyan nga ar-aramaten dagiti babbai iti rehiyon.
Malaksid iti dayta, isimsimbolo ti Kayabang ti nabaknang a produksyon kadagiti higland vegetables rason a nabigbig ti La Trinidad kas “Salad Bowl of the Philippines.”
Kabayatanna, tawen 2004 idi naala ti La Trinidad, Benguet ti Guinness World Record para iti kadakellan nga strawberry shortcake iti sangalabungan nga addaan kadagsen a 9, 622.29 kilos ken agingga iti agdama ket iggem pay laeng ti munisipyo ti nasao a world record.
