More than ready itan dagiti maseknan nga opisina iti Baguio City para iti panangpasangbay dagitoy kadagiti turista ita a Semana Santa.
Iti panakiuman iti Bombo Radyo kenni Engineer Charles Carame, opisyal iti City Disaster Risk Reduction and Management Office-Baguio, nalpasen ti panagtataripnongda kadwa dagiti kameng iti pulisya ken dagiti volunteer groups kasta met a nakalatagen dagiti plano dagitoy.
Sigun kenni Engr. Carame, kangrunaan a bantayanda dagiti entry points ken exit points iti City of Pines babaen iti panakitinnulong dagiti boluntaryo.
Malaksid iti dayta,karaman metlaeng a mabantayan dagiti nagduduma a pagpasyaran iti siudad ken dagiti Visita Iglesia kas iti kadawyan a mapaspasamak.
Immuna metten a nakikoordinarda kadagiti nagduduma a simbaan iti City of Pines.
Mainaig iti dayta,kinuna ni Engr. Carame nga agtaltalinaed iti blue alert ti siudad ita a Semana Santa ken bakasyon nu sadino, stand by dagiti amin a maseknan a personnel kadagiti posible a respondean dagitoy.
Iti agdama,kinuna ti opisyal nga awan pay ti nailislistada a major incidents bayat ti panagdudupadop dagiti turista ngem saan daytoy nga inlibak nga adda latta dagiti nailistada a minor incidents.//Bombo Rob Dominguez
