Simmangpeten dagiti official ballot boxes a maaramat para iti 2025 National, Local, ken BARMM Elections iti probinsya ti Benguet ken siyudad ti Baguio idi kalman.
Iti panakiuman ti Bombo Radyo kenni Atty. Vanessa M. Roncal, ti Baguio-Benguet Election Supervisor ken Assistant Regional Director-CAR, nasurok 400 a ballot boxes ti simmangpet para iti probinsya ti Benguet ken 232 met a ballot boxes iti siyudad ti Baguio.
Sigun kenni Atty. Roncal, awan met ti nakitada nga aniaman a parikut kadagiti ballot boxes gapu ta awan kadagitoy ti nadadael ken na tamper ti sealna.
Kasta pay amin a dagiti ballot boxes ket addaan iti umno a label.
Immuna a simmangpet dagiti balota para iti probinsya ti Benguet iti agarup alas ocho ti agsapa idi kalman ken simmangpet met iti siyudad ti Baguio agarup alas dyes ti agsapa idi kalman.
Iti agdama, daytoy ket naiturong iti Baguio City Hall ken daytoy ket mairuar ken malukatan inton Mayo a onse para iti panakaiwaras dagitoy iti nagduduma a barangay para iti eleksyon.
