Kiniddaw ti Commission on Elections (Comelec) iti Department of Agriculture (DA) nga itantanda pailaeng ti roll-out ti 20/kilo Rice Project kagiddan ti pannakaiparit ti panangipaay ti ayuda, sangapulo nga aldaw sakbay ti 2025 midterm elections.
Sigun kenni COMELEC Chairperson George Erwin Garcia, nasaysayaat nu maisardeng pailaeng ti nasao a programa agingga a malpas ti eleksyon tapno saan a maaramat iti pulitika wenno kampanya.
Inlawlawag met ti nasao nga opisyal a saan nga intensyon ti COMELEC a lapdan ti serbisyo publiko ngem nalawag iti linteg a saan a rumbeng nga aramaten ti pundo wenno programa ti gobyerno para iti personal nga interes dagiti kandidato.
Maipalagip nga inaprubaran ti COMELEC ti pannakailaksid ti Department of Agriculture iti 45-day election spending ban para iti P20 tunggal kilo ti bagas.
Nupay kasta, nangipaay ti COMELEC iti kondisyon ti panagala iti sabali a certificate of exemption dagiti lokal a gobyerno a kayatna nga agilako ti bagas iti nababa a presyo.
Impetteng pay ti komisyon a nasken a mailako ti nababa a presyo ti bagas kadagiti parapubliko a lugar a nawaya a serken ti media, civil society organizations ken dadduma pay a grupo nga interesado.
Maibasar iti Omnibus Election Code, ti panaglabsing kadagiti maiparparit nga aktibidad iti panawen ti eleksyon ket maibilang kas election offense ken mabalin a maibalud iti maysa agingga innem a tawen.
