BAGUIO CITY- Agkidkiddaw iti tulong ti kapitan ti Harrison Carrantes Claudio, Baguio City kadagiti jeepney Drivers, dispatsers, business establishments ken residente ti pannakaimanihar ti basura iti nasao a barangay.
Iti panakiuman ti Bombo Radyo Baguio kenni Marcelo Acupan, Barangay Captain ti nasao a barangay kinunana a maysa a mangpakpakaro iti basura ti kina-adu ti jeepney terminal iti masakupan dagitoy.
Kinunana nga idi pandemic ket naiyapan wenno immakar amin dagiti jeepney terminal iti masakupan dagitoy gaputa ti lugar dagitoy ti kaasitgan.
Nupay kasta, parikut dagiti maur-urnung a basura.
Impeksa ti kapitan a saan nga amin a terminal ket narugit ngem adda dagiti sumagmamano a naobserbaranna a narugit.
Daytoy ti makagapu nga ibilbilinna ti panagdalus dagiti dispatsers, drivers ken dadduma pay a maseknan nga indibidual no malpas ti biahe dagitoy.
Malaksid iti dayta, imbilinna pay a rumbeng nga adda ti sako wenno basuraan a nakalatang sadiay tapnu adda ti naksagana a pangibellengan dagiti pasaheros dagitoy.
Iti sabali a bangir, maysa a sangsangwen dagitoy a parikut ket dagiti convoy iti night market nga aggugulo wenno natatagari iti rabii.
Sigun kenni kapitan Acupan, kaaduan kadagiti residente ti agreklamo gapu iti nasao a parikut.
Iti impormasyon a naawat ti Bombo Radyo manipud kadagiti driver, agtambay dagiti convoy iti paset ti Diego Silang tapno agiinum.
Ibatida metlaeng dagiti basura ken naginuman dagitoy iti arak.
Immuna metten a naiuman ti nasao a parikot kadagiti kameng ti pulisya tapno tumulongda nga agkaronda iti nasao a lugar.//Bombo Noveh Organo
