Nagkiddaw iti pammakawan ni Marifa Leah Ludaes kenni Benguet Congressman-elect Eric Go Yap ken kadagiti supporters daytoy. Daytoy ket kalpasan a nangipila ti amana a ni Mario S. Ludaes iti disqualification case kontra kenni Yap.
Iti facebook post ni Marifa, nagpasensia daytoy iti kaso nga impila ti amana, ken inaklonna a naapektaran ti “peace of mind” ti kaaduan isut gapuna nga agkidkiddawda ti pammakawan.
Impakaamona a ti addang nga inaramid ti amana ket bukoddna nga aramid ken saanda nga ammo ti intension daytoy.
Inlawlawagna a saanda a nakipaset wenno sinuportaran ti desision ti amada a mangipila iti kaso kontra iti nabutosan a Congressman.
Inaklonna a maladangitan metlaeng iti sitwasion ken ti epektona iti komunidad.
Kinunana a napateg kadakuada ti talek ken panagraem nga impaay dagiti umili ti Benguet kadagiti nabutosan nga opisial, ken bigbigbigenda ti kinapateg ti panangmintinir ti talna ken panagkaykaysa iti uneg ti komunidad.
Kidkiddawen ni Marifah ti pannakaawat iti tunggal maysa.
Agpapakaasi pay daytoy kadagiti mabalin nga addang nga aramiden ti publiko kontra kadakuada a posible a mangpataud iti “stress” wenno pannakariribuk.
Kinunana a maikarida iti talna ken pulos a saanda nga ummanamong iti nakababain a kababalin.
Dinakamatna pay nga ikonsidera ti tattao ti pamiliada.
