Naituding a maipatungpal ti peace rally inton May 28 idiay La Trinidad Public Market(parking) nga idauloan iti Proclaim Cong.Yap Now Movement.
Daytoy ket maysa nga addang tapno mabigbig ti nagbalin a pangngeddeng iti kaaddoan iti kalleppas nga eleksyon seknan iti agtugaw a cogressman iti probinsya iti Benguet.
Iti panakiuman iti Bombo Radyo kenni Gary Paul Abela, lead convenor iti Proclaim Cong.Yap Now Movement, addan ti insaganada a manifesto a mangipakpakita iti solidarity dagiti nangibotos kenni Benguet Congressman-elect Eric Go Yap ken tapno kiddawen iti Commission on Elections nga iproklamada daytoy.
Ti nasao a manifesto ket maiyaw-awis a pirmaan iti amin a maseknan.
Sigun kenni Abela, napigsa ti suporta manipod kadagiti grassroots ken kadagiti organisasyon a nangibotos kenni Yap para iti nasao a tignay.
Maibasar iti naibinglay a datos, dumanon iti agarop 144,000 ti nangibotos kenni Yap rason a makidkiddaw ti panakaiproklamana a mangibagi wenno mangirepresentar iti probinsya iti Benguet iti Kongreso maitunos iti pagayatan iti kaadwan.
Innayon ni Abela nga ipakitada manen ti suportada kenni Yap ita, iti baet a naipakitan daytoy idi eleksyon a panpaneknekan iti naawatna a botos.//Bombo Rob Dominguez
