Nakairekord ti Department of Health (DOH) ti nasurok 110,000 a kaso ti dengue iti intero a pagilian manipod Enero agingga May 10, iti agdama a tawen.
Iti nasao a bilang, nakailista ti nasao nga ahensia iti 437 a pimmusay, a kaaduan ket agtawen ti lima agingga iti siam.
Sigun kenni Public Health Services Cluster Assistant Secretary Farwa Hombre, nababbaba ti resistensia dagiti ubbing nu idilig kadagiti nataengan, isu nga ad-adda a nalaka a maakaran dagitoy iti dengue.
Iti baet ti nasao a kaso, impasigurado ti Department of Health a papigsaenna ti kampaniana nga “Alas Kwatro Kontra Mosquito,” a mangidagdagadag kadagiti pagadalan nga usarenda ti “Magtaob, taktak, tuyo, at takip” a posible a lugar para kadagiti larva.
Maibalbalakad pay kadagiti indibidual nga agpakonsulta iti doktor nu makarikna ti aniaman a sintomas.
Sigun kenni Hombre, mabalin nga agtungpal iti ipupusay nu saan a malapdan ti dengue.
