Umad-adado ti bilang dagiti ubbing a maad-addaan iti kidney disease, dayta ti impakaamo ni Dr. Virginia Mangati, Medical specialist 3 Head ti Adult Nephrology Section ti Department of Internal Medicine iti Baguio General Hospital and Medical Center.
Sigun kenni Dr. Mangati, dumanon ti agarup 50-K iti intero a Pilipinas ti maipaspasidung iti hemodialysis idi tawen 2023 bayat a ti maipaspasidong iti peritoneal dialysis ket dumanon iti 319.
Gapu iti dayta, kinunana nga alarming ti panagngato ti bilang dagiti ubbing a maad-addaan iti nasao a sakit.
Inlawlawag met ni Dr. Maria Theresa Bua-ay, pediatric nephrology a ti rason iti panakaadda iti sakit ket saan laeng a gapu iti lifestyle no diket mabalin a ti maysa a pamilya ket addaan iti history iti sakit ti bato, ti panakabaybay-an dagiti sakit a kas iti diabetes, urinary tract infections ken daduma pay.
Innayon ni Dr. Mangati nga agarup 40% nga adaan iti diabetes ket addaan met laeng iti kidney diesease.
Impakaamo ni Dr. Bua-ay nga iti Baguio General Hospital and Medical center, ti kaubingan a pasyenteda iti agdama a maipaspasidong iti dialysis ket agtawen iti pito.
Agpalpalagip met dagiti dua a doktora a tapno maliklikan ti kidney disease ket kasapulan a liklikan ti nalabes a panangan kadagiti nasam-it ken naapgad a taraon.
Maiyunay-unay met ti kanayon a panaginom iti danum ken ti saan a panangteppel no makasis-isbo ti maysa nga indibidual.
Kabayatanna, dagiti simtomas iti kidney disease kas iti panagmanas kangrunaan ti rupa, maris nalabaga nga isbu; panagngato ti blood pressure, panag-gurigur; narigat ken nasakit a panag-isbu; panagsakit ti tian ken daduma pay.//Bombo Noveh Organo
