LA TRINIDAD, BENGUET – Impatangken ti maysa a residente a ti lay by area wenno igid ti kalsada a maipatpatakderan ti balayna idiay Beckel, La Trinidad, Benguet ket sakop ti lote wenno sanikuana kas maibasar iti surveyor daytoy.
Sigun kenni Oscar Dodon, addaan daytoy iti tax declaration ken Primary Sampling Unit (PSU) a nagtaud iti Department of Environment and Natural Resources (DENR) a nakanagan iti uncle daytoy idi pay 1967.
Imbinglayna nga idi napalpalabas a tawen ket nargaay ti sigud a provincial road nga abay ti loten rason a nangaramid ti Department of Public Works and Highways ti kalsada iti masakupanna a lote.
Kinunana pay nga idi manarimaan ti pannakaaramid ti kalsada ket nagsurat daytoy iti DPWH a mangipakpakaamo a sakop ti lotena ti pakaar-aramiden ti kalsada agingga a saan daytoy a nagsasaon gapu ta sigun kenkuana ket ammona a kasapulan nga adda ti maaramid a provincial road iti masakupanna.
Kabayatanna, sinungbatan met ni Dodon ti reklamo kontra kenkuana a mangituntunda iti obtruksyon dagiti nakaparada a luganna iti igid ti kalsada iti nasao metlaeng a barangay.
Inaklonna a nakasali dagiti nakaparada a luganna rason nga inikkatda dagitoy ngem kinunana nga adda laeng ti maysa a lugan a saan pay a naikkat gapu ta awan ti makinana ken saanen nga agan-andar.
Nupay kasta, impettengna a saan laeng nga isuna ti aglablabasing iti road obstruction iti nasao a barangay gapu ta ado metlaeng dagiti dadduma ngem impeksana a kasla isuna laeng ti kitkitaenda.
Impeksa pay ni Dodon a nu aniaman ti parikut wenno reklamo maipapan kenkuana ket nakasagana daytoy a makisarita.
