Pimmusay ti kaipaspasngay a maladaga kalpasan a naipit iti kadena ken pilid ti tumartaray a motorsiklo idiay Tagkawayan, Quezon idi kalman.
Maibasar iti report ti pulisya, iggem ti ina ti maladaga a nabalkot iti ules bayat a nakalugan dagitoy iti motorsiklo nga imanmaneho ti live-in partnerna paawid idiay Del Gallego, Camarines Sur.
Naammoan a karuarda iti ospital kalpasan a naipasngay ti maladaga, tallo nga aldaw ti napalabas.
Nupay kasta, bayat ti biahe dagitoy ket saan a napuotan ti ina ken ti ama a limmaylay ti ules ken simmabit iti kadena ti motor rason a naguyod ti maladaga ken naipit iti pilid ti motor.
Dagus met a nagkiddaw iti tulong dagiti ag-partner ngem narigatan dagiti rescuers a nang-ala iti maladaga gapu iti nakaro a pannakaipit daytoy.
Naitaray ti maladaga iti ospital ngem naideklara a dead-on-arrival.
Manarimaan pailaeng ti kanayonan nga imbestigasyon ti Tagkawayan Municipal Police Station iti napasamak nga insidente.
