IFUGAO – Naduktalan a sumagmamano kadagiti Barangay officials iti nagduduma a Barangay idiay Ifugao ti saan a makin-ammo a mangimanihar kadagiti kaso iti Violence Against Women and Children (VAWC).
Iti panakiuman ti Bombo Radyo kenni Atty. Cristy Challoy-Locaben, imbinglayna nga awan ti desk officer dagiti sumagmamano a barangay iti nasao a probinsya.
Daytoy ket iti baet nga adda ti opisina a nairanta para kadagiti kaso iti Violence Against Women and Children (VAWC).
Sigun kenni Lacoben, maysa daytoy kadagiti makitkitana a rason iti agtultuloy a panagdudua dagiti dadduma a biktima nga agkiddaw iti tulong.
Malaksid iti dayta, naduktalan pay ti nasao nga abogado a saan a kabisado dagiti maseknan a personnel ti pagannurutan ken umno a proseso para iti nasao a serbisyo.
Partikular iti bilang ti aldaw nga ikargada iti expiration ti Barangay Protection Order, maysa a bilin nga ipapaiyulog ti kapitan iti barangay wenno kagawad tapno maprotektaran dagiti biktima iti panang-abuso.
Mangbilin daytoy iti perpetrator nga isardengna ti aramidna a panang-abuso.//Bombo Genzel Depayso
