Impakaamo ti Department of the Interior and Local Government (DILG) a bimmaba ti bilang ti index crimes bayat ti umuna a kagudua ti tawen 2025.
Sigun kenni Interior and Local Government Secretary Jonvic Remulla, ti index crimes a kas ti panagrames, panangdangran iti pisikal ken panagtakaw ket dakkel ti bimmabaanna manipod idi Enero 1 agingga Hunio 6 iti agdama a tawen nu idilig iti agpada nga aldaw idi napalabas a tawen.
Imbinglay ni Remulla ti nasao a banag bayat ti 1st Joint National and Regional Peace and Order Council (NPOC-RPOC) meeting.
Kinunana a ti insidente ti panagrames ket bimmaba iti 31.85%, ti panangdangran iti pisikal ket 30.21%, ken ti panagtakaw ket 26.47%.
Pinagyamanan ni Remulla ti agtultuloy nga anti-criminality a kampania ti nasao nga ahensia gapu iti panagbaba ti bilang dagiti nasao a krimen.
Kabayatanna, inyuswat dagiti otoridad ti 22,649 anti-drug operations a nagresulta iti pannakatiliw ti 24,148 nga indibidual ken ti pannakumpiskar ti agarup 200,000 a gramo ti iligal a droga nga agbalor ti P2.17 billion.
