Nasarakan nga awanan iti biag ti lalaki nga agtawen ti 38, residente ti San Fabian, Pangasinan, idiay munisipyo ti Tuba, Benguet.
Maibasar iti report ti pulisya, naduktalan a naggatang ken naginom iti nasanger nga arak ti biktima, maysa nga aldaw sakbay ti ipupusayna.
Kalpasan ti sumagmamano a minuto, nakita ti katrabahuanna a nakaidda iti bathroom a nabasbasa agsipudta nabaybay-an a nakalukat ti faucet.
Gapu iti dayta, nagtinnulong dagiti katrabaho daytoy nga iturong iti pagididdaanna.
Nupay kasta, kalpasan ti sumagmamano nga oras, nakitada nga adda ti bula nga agtataud iti ngiwatna ken saan daytoy a “responsive.”
Dagus a naitawag ti napasamak iti istasyon ti pulisya ken naikoordinarda metlaeng iti MHSO-Tuba nu sadinno maibasar iti initial findings ket pimmusay ti lalaki gapu iti acute respiratory failure secondary to hypertensive stroke.
Nagkedked metten ti kabsat daytoy nga ipasidong iti otopsiya ti biktima agsipudta mamati daytoy a natural ti rason ti ipupusay ti nasao a lalaki.
