Parikut ita ti Barangay City Camp Proper ti sumagmamano a sewerline wenno pipe manipod iti banyo a nakadirekta iti kanal.
Iti pannakiuman ti Bombo Radyo kenni Monica Sikat, Barangay Kagawad ti City Camp Proper, kinunana nga idi damo, naiyuman ti nasao a parikut iti lokal a gobierno ti siudad a dagos met nga inaksyunan ti maseknan a departmento.
Ngem saan a bimmayag, nagsubli manen ti nasao a parikut.
Sigun iti nasao nga opisial, ik-ikatenda dagiti nakapullat kadagiti pipes tapno laeng maibulos dagiti rugit dagitoy.
Dinakamat pay ti nasao nga opisial a maysa kadagiti “susceptible” iti panaglayos ket to Purok 3 iti nasao a barangay nu sadinno, namindua a daras a nakapasar ti nasao a purok iti panaglayos sipud idi nagtudo.
Nupay kasta, sigun iti kagawad, nakasagana latta dagitoy nga agresponde iti aniaman a tulong manipod kadagiti masakupanda a barangay.
Kabayatanna, kidkiddawenna iti publiko ti panagtinnulong dagitoy kas ti kusa a panangdalus kadagiti kanal nu maimatangan a nangato ti lebel ti danum.
Mabalballakadan pay dagitoy nga iti tunggal balay ket maaddaan kuma iti “go bag.”/Bombo Noveh Organo
