Agtaltalinaed a nakaalerto ti Municipal Disaster Risk Reduction and Management Office-Buguias, Benguet, nangruna ita a panagtutudo.
Iti pannakiuman ti Bombo Radyo kenni Satur Payando, dadaulo ti Municipal Disaster Risk Reduction and Management Office-Buguias, kinunana a maysa kadagiti kangrunaan a banbantayanda ket sadiay Loo, Buguias agsipudta iti nasao a parte ti munisipyo ti pagnaan ti danum manipud iti Agno River.
Gapu iti dayta, no mapasaran ti napigsa a panagbayakabak ti todo ket aglayos sadiay.
Nupay kasta, iti agdama ket nasayaat latta ti kasasaad iti nasao a munisipyo.
Iti baet dayta, kinuna ni Payangdo nga adda latta dagiti gundaway a ngumato ti lebel ti danum nangruna no agtudo iti napigsa, ngem napartak metlaeng a bumaba ti lebel ti danum daytoy.
Malaksid sadiay Loo, maysa metlaeng a nainget a banbantayan dagitoy ket ti panagreggaay ti daga sadiay Congressman Andres Acop Cosalan Road, partikular iti paturong sadiay Ambuklao, Bokod, Benguet nangruna iti Man-asok section a paset ti Baculongan Sur, Buguias pababa idiay Poblacion.
Kinunana a naobserbaranda ti panagreggay ti daga sadiay iti baet nga awan ti napigsa a tudo.
Mainaig iti dayta, imbinglay ni Payangdo nga idi napan a lawas ket adda ti nagreport nga adda ti indication of cracks iti pagtaenganda rason a nagaramid ti Barangay iti pre-emptive evacuation kadagiti naapektaran a pamilya.
Kagiddan dayta, nagballaag daytoy kadagiti umili nga agridam tapno maliklikan ti saan a nasayaat nga insidente, mabalbalakadan pay dagiti byaheros, kadagiti gardenero nga adda iti asideg dagiti karayan a liklikanda paylaeng nga agdalyasat iti kanito a napigsa ti ayos ti danum.
Mapalpalagipan metlaeng dagiti bumalay iti asideg dagiti kanal ken karayan nga agbakwitda iti kanito a mapiliiwda a pumigsa ti ayos ti danum.
